Friday, January 21, 2022

सभापतिका दावेदार शेखर नै पार्टी विधानबारे बेखबर

विराटनगर । नेपाली कांग्रेसको १४ औं महाधिवेशनमा सभापतिका प्रमुख दावेदार मानिका डा. शेखर काइराला नै पार्टी विधानबारे बेखबर रहेको पाइएको छ । कोइराला लगायतका नेता पार्टी विधानबारे बेखबर हुँदा कांग्रेस प्रदेश १ को अधिवेशनमा आफ्नै पक्षका उम्मेदवार गुरुराज घिमिरेले हार व्यहोरेका छन् । नेताहरु शेखर कोइराला, सुजाता कोइराला, महेश आचार्य, बलबहादुर केसी लगायतले प्रदेश अधिवेशनमा मतदान गरेका थिएनन् । उनीहरु मतदानमा सहभागी नहुँदा घिमिरे दुई मत अन्तरले पराजित भएका थिए ।

आफू पक्षका उम्मेदवारलाई समेत भोट नहाल्दा पराजय व्यहोर्नु परेको भन्दै सामाजिक सञ्जालमा विरोध भइरहँदा नेता शेखर कोइरालाले ‘भविष्यमा जटिलता आउन सक्ने’ भएकाले मतदानमा सहभागी नभएको जनाएका छन्। उनले आफूबाट गल्ती भएको भए भन्दै क्षमा मागेका छन् । ञसंस्थापनइतरका घिमिरे सभापतिमा उद्धव थापासँग दुई मतले पराजित भएका छन् । मतगणनामा असन्तोष जाहेर गर्दै घिमिरेले पुनः मतगणनाको माग गरेका छन् ।
पार्टी उपसभापति पदमा दाबी गरिरहेका आचार्यले पनि मतदानमा भाग लिएनन् । नेतृ सुजाता कोइरालाले पनि मतदान गरिनन् । केन्द्रीय सदस्यले मतदान गर्न पाउने–नपाउने बारे ‘अन्योल रहेको’ दाबी गर्दै उनीहरु मत नहालि काठमाडौं फर्किएका थिए । यस घटनाले शीर्ष तहका नेताहरु नै पार्टीको विधानलाई अध्ययन गर्दैनन् भन्ने देखिएको छ ।

कांग्रेस विधानको १३ औं नम्बरको १ ‘ख’ मा भनिएको छ ‘सम्बन्धित प्रदेशभित्रका निवर्तमान केन्द्रीय सभापति, उपसभापति, महामन्त्री, कोषाध्यक्ष, सहमहामन्त्री र केन्द्रीय कार्यसमितिका सदस्य एक अवधिका लागि प्रदेश अधिवेशनका सदस्य’ हुने उल्लेख छ । प्रष्ट उल्लेख हुँदाहुँदै पनि नेताहरुले मतदानमा भाग नलिएपछि केन्द्रको चुनावमासमेत यसले असर गर्ने संस्थापन इतरकै नेताहरु बताउँछन् ।

‘शेखर राजनीतिमा आउनु भएको धेरै भएको छैन,’ संस्थापन पक्षका एक नेताले भने, ‘उहाँ हिजोअस्तिसम्म विपि कोइराला स्वास्थ्य विज्ञान प्रतिष्ठानमा जागिरेका रुपमा हुनुहुन्थ्यो । कोइराला परिवारको भन्दैमा नेतृत्व जिम्मा लगाइने हाल्ने कुरा हुँदैन।’ मतदानमा भाग नलिएको कुरा पनी उनी राजनीतिमा आलोकाँचो रहेको देखाएको उनको भनाइ छ ।

शनिबार विराटनगरमा भएको मतदान कार्यक्रममा शेखर, सुजाता र महेशले मात्रै भोट खसालेको भएपनि गुरूले आफ्नो राजनीतिलाई खुम्चाउनु पर्ने अवस्था बन्ने थिएन । झापाका थापाले ८४४ मत प्राप्त गर्दा मोरङका गुरूले भने ८४२ मत पाए । ‘ठूला नेताले प्रदेशमा भोट हाल्दा इज्जत जाने डरका कारण आफैंले सभापतिबाट हात धोएर हिँड्ने अबस्था आयो’ संस्थापनइतरका एक नेताले भने ।

प्रदेश १ कांग्रेस संसदीय दलका नेता राजीव कोइराला र घिमिरेले दाबी पेस गर्दा राजीवको पक्षमा सुजाता कोइराला र प्रदेश १ संसदीय दलका नेता केदार कार्की मात्रै उभिए । शेखर कोइराला, महेश आचार्य, मिनेन्द्र रिजाललगायतका नेताहरु घिमिरेको पक्षमा उभिएका थिए । प्रदेशका अधिकांश शीर्ष नेता गुरुको पक्षमा उभिएपछि उनले उम्मेद्वारी पाएका थिए । आफ्नै उम्मेद्वारलाई शीर्ष नेताले मतदान नगर्दा अन्ततः गुरू पराजित भएको भन्दै कार्यकर्ताले नेतृत्वमाथि असन्तुष्टि पोखिरहेका छन् ।

सम्बन्धित समाचारहरु

Leave a Reply

धेरै हेरिएका
- Advertisment -

ताजा समाचार

%d bloggers like this: